A USC súmase aos actos do Día Europeo da Ópera

A USC súmase aos actos de conmemoración do Día Europeo da Ópera que se celebra este sábado 10 de maio, cun concerto no Paraninfo da Universidade a cargo da Asociación Lírica En-cantados e un recital lírico no Teatro Pinrcipal organizado pola Asociación Amigos da Ópera. Estas actividades pretenden achegar as obras máis clásicas do repertorio musical lírico ao público xeral para fomentar o gusto por este xénero. O concerto do Paraninfo comeza ás 20.00 horas e inclúe as pezas máis recoñecidas de obras como Bastian e Bastiana e as Vodas de Fígaro de Mozart; O barbeiro de Sevilla de G. Paisiello; ou Macbeth e A Traviata de Verdi. O cadro de intérpretes está composto pola soprano Rebeca Trillo, o tenor Ángel Chumarreo, a soprano Salomé García, o tenor Alejandro Ossandon, as sopranos Charlene Harriswanglez e Rosalía Cid, o barítono Pablo Nieves, a soprano Cecilia Cueto. Como pianista acompañante actuará Vera Pulova baixo a dirección artística de Diana Somkhieva. Por outra banda, e dentro das actividades da Semana da Ópera en Compostela que organiza a Asociación Amigos da Ópera coa que colabora a USC, o Teatro Principal acolle o sábado 10 ás 20.00 horas o recital lírico da soprano María Ruíz con Carlos E. Pérez ao piano que homenaxearán a Wagner, Verdi, Rossini e Puccini.