A Facultade de Ciencias da Educación da USC acolle o luns, 9 de marzo, o acto académico de conmemoración do patrón do centro Frei Martín Sarmiento. A sesión presidida polo vicerreitor de Transformación Dixital e Innovación, Gumersindo Feijoo Costa, desenvolverase a partir das 11.00 horas no Salón de Actos da Facultade no Campus Norte. Ademais do vicerreitor, intervirán a decana Mar Lorezo Moledo, a vicedecana María López Sández, e o secretario Jesús García Álvarez. A lección maxistral corre a cargo da escritora, mestra e académica da RAG, Fina Casalderrey, baixo o título 'A pegada do camiño ensinando. Educar coa palabra: escola, lingua e literatura para a vida'.
No transcurso do acto, procederase á entrega de diplomas dos Premios Extraordinarios de Grao e Mestrado do curso académico 2024/2025 e ao recoñecemento dos Premios de Doutoramento do curso académico 2022/2023. Tamén se fará entrega dos Sarmientos de Honra a profesorado do centro. O acto conta coa actuación musical de Javier Varela Prados, estudante do Mestrado Universitario en Investigación e Innovación en Didácticas Específicas para Educación Infantil e Primaria da USC.