A USC acudirá este ano aos campionatos galegos universitarios de deportes colectivos, natación, orientación, xadrez e pádel

A Universidade de Santiago de Compostela volverá a contar este ano con representación nos campionatos galegos universitarios, unha competición aberta á participación de equipos e deportistas das tres universidades galegas e que nesta edición se desenvolverá nas modalidades de natación, deportes colectivos, xadrez, orientación e pádel. O Servizo de Deportes da USC mantén aberto o prazo de inscrición para poder tomar parte nunha competición interuniversitaria que abrangue distintas disciplinas deportivas e cuxas probas se desenvolverán nesta edición desde finais de febreiro ata finais de abril en instalacións deportivas emprazadas nos campus de Compostela, A Coruña e Vigo. As persoas interesadas en obter máis información relativa ao desenvolvemento destas competicións interuniversitarias ou sobre os prazos de inscrición poden dirixirse ás oficinas do Servizo de Deportes da USC nos campus de Compostela e de Lugo ou entrar na páxina web do Servizo de Deportes da USC. De xeito parello á celebración desta nova edición dos campionatos galegos universitarios, a Universidade de Santiago tamén organizará nos vindeiros meses diversos torneos de distintas disciplinas, tales como tenis, tenis de mesa, bádminton, taekwondo, xadrez, baloncesto, esgrima, kárate, baloncesto 3x3, atletismo en ruta e atletismo en pista. A información relativa a prazas de inscrición, datas e desenvolvemento destes torneos, abertos á participación de membros da comunidade universitaria da USC e tamén de persoas convidadas, estará accesible na web do Servizo de Deportes da USC tan pronto como se publiquen os respectivos regulamentos.