O Festival Internacional de Teatro Universitario da USC congrega en Compostela a compañías de Estados Unidos, Porto Rico, Lituania e Bélxica

A vixésima edición do Festival Internacional de Teatro Universitario da USC celebrarase entre este luns 17 e o sábado 22, no Salón Teatro de Compostela con entrada gratuíta previo paso polo despacho de entradas. Están programadas un total de seis representacións a cargo de agrupacións teatrais de Estados Unidos, Porto Rico, Bélxica Lituania e da propia USC. Todas as montaxes formulan propostas escénicas diversas, dende o teatro máis físico da agrupación lituana á proposta musical de Porto Rico ou a mestura entre o teatro, a imaxe e o recital proposto pola compañia nortamericana, segundo explicou o director da Aula de Teatro da Universidade de Santiago, Roberto Salgueiro, na presentación do festival, xunto ao director da Área de Cultura da USC, Pablo Sampedro. Ambos mostraron a súa satisfacción porque a pesar do contexto económico actual o festival poida manter a súa presenza na oferta escénica, o que o converte no único festival internacional deste perfil existente en toda España. A programación abriraa a Compañía de Teatro da Aula de Teatro da USC coa representación o luns 17 e o martes 18 do seu traballo ‘Apnea (Variación 2ª)’, unha peza en galego de aproximadamente 47 minutos de duración. A compañía profesional CORE Theatre Ensemble, residente na Old Dominion University, tomará o relevo o mércores 19 representando ‘The poe [N., Proj-ekt]’, de 50 minutos de duración e en inglés. A compañía Teatro Rodante do Departamento de Drama da Universidade de Porto Rico porá na escena o xoves 20 do musical ‘Platero y yo’, a partir do texto de Juan Ramón Jiménez, nunha proposta de aproximadamente 60 minutos. O programa proseguirá o venres 21 da man de Dramos Trupé Minimun, da Vilniaus Universiteto Treatras de Lituania, que executará ‘Circus’ de Juozas Grušas. Esta vixésima edición do Festival Internacional de Teatro Universitario botará o pano logo da exhibición de ‘Le dernier Godot (The last Godot)’, unha proposta de Théâtre Universitaire Royal de Liège (Bélxica) a partir do texto de Matéi Visniec, unha das compañías universitarias máis antigas de Europa. Todas as representacións desenvolveranse no Salón Teatro ás 21.00 horas.