O Consello Superior de Deportes (CSD) convoca cada ano os Campionatos de España Universitarios (CEU) nunha ampla variedade de modalidades deportivas.
Nos CEU poderán tomar parte todas aquelas persoas que se atopen matriculadas na USC no curso 2025-26 e que acrediten ser estudantes de grao, máster ou doutoramento, dos títulos que teñan carácter oficial e validez en todo o territorio nacional.
Os CEU 2026 convócanse nas seguintes modalidades deportivas:
a.- Deportes individuais: atletismo, bádminton, baloncesto 3X3, campo a través, carreiras por montaña, escalada, esgrima, golf, halterofilia, hípica, iudo, karate, loita, natación, orientación, pádel, remo, surf, taekwondo, tenis, tenis de mesa, tiro co arco, triatlón, vela, volei praia e xadrez.
b.- Deportes de equipo: baloncesto, balonmán, fútbol, fútbol sala, rugbi 7 e voleibol.
En función dos recursos dispoñibles, a Universidade de Santiago de Compostela seleccionará e autorizará a participación nos CEU de acordo cos seguintes requisitos:
-
Estar en posesión da licenza federativa da tempada en curso na modalidade na que quere participar.
-
Cumprir os requisitos de participación establecidos nos regulamentos técnicos das distintas modalidades deportivas convocadas nos CEU.
-
Comunicar antes do 01/02/2026 a intención de participar nos campionatos de deportes individuais cubrindo a solicitude.
-
En deportes de equipo realizarase a solicitude rematados os Campionatos Galegos Universitarios (CGU).
A selección para participar nos CEU corresponderá ao persoal técnico da Área Deportiva, podendo solicitarse, de ser o caso, informes de persoas asesoras externas.
Nos deportes individuais teranse en conta os mellores resultados acadados en competicións oficiais durante a segunda metade da tempada 2025 e primeira do 2026, así coma o nivel e/ou clasificación nacional e/ou autonómica no momento de presentación da solicitude.
En deportes colectivos ademais de quedar campión da modalidade nos CGU, terase en conta os recursos dispoñibles e o nivel deportivo do equipo.