A exposición ‘150 anos de atención á diversidade’ no claustro alto de Fonseca

O claustro alto do Colexio de Fonseca acolle a exposición ‘150 anos de atención á diversidade’ que será inaugurada este luns 2 de xuño ás 12.30 polo reitor Juan Casares e que está organizada pola comunidade educativa do CEE Manuel López Navalón e campUSCulturae para contar a historia da integración desta comunidade na sociedade compostelá. A mostra recolle en oito vitrinas diversos obxectos da historia do centro, que naceu en 1864 baixo o patrocinio da USC, como planos do edificio de San Caetano que o albergou, pasando por esculturas e outros traballos de alumnos e profesores así como diferentes aparatos antigos empregados para a rehabilitación de xordos.