A Facultade de Matemáticas da USC recibe unha delegación de estudantes da Universidade de Tsinghua

A Universidade de Tsinghua conta cunha "escola de líderes" denominada Shuimu College. 

A visita realizouse no contexto da recente posta en marcha dos primeiros estudos de posgrao relacionados con China no Sistema Universitario de Galicia, en particular o Diploma de Especialista en Economía e Política China, dirixido por profesorado da USC. A iniciativa responde tamén á solicitude trasladada tras a visita a Santiago de Compostela do ministro de Educación da Embaixada de China a finais do pasado ano. 

Os estudantes foron recibidos polo decano da Facultade de Matemáticas, Alberto Cabada, e polo vicedecano Antonio Tato, quen lles deron a benvida e lles amosaron as instalacións do centro. Durante a visita, a delegación puido coñecer de primeira man a historia e a evolución da facultade, así como os primeiros equipos informáticos cos que contou a USC, e en particular a Facultade de Matemáticas, destacando o papel pioneiro destas infraestruturas no desenvolvemento da docencia e da investigación. 

O grupo visitante combina estudantes de mestrado e de grao, varios deles en fase de desenvolvemento dos seus proxectos finais. Os seus intereses inclúen ámbitos como o software, as enxeñarías do transporte, os materiais e outras áreas científico-tecnolóxicas.